Gure herriko eskola bakarra Ikaztegietako Herri Eskola da. Izen berdina daraman herrian kokatua eta bertan, herriko ia haur guztiak eskolatzen ditu.

Ikaztegieta, Tolosaldeko bailaran kokatua dago eta 400 biztanle inguru ditu.

Irakasle, ikasle eta gurasoen eguneroko esku hartzearekin osatzen eta egiten dugu eskola.

         Ofizialki, lau gelatan funtzionatzen dugu; haur kopuru eta mailei begiratuz antolaketa alda daiteke urte batetik bestera. Egun, 46 haur ditugu 2 urtetik 12 urtera bitartean.

         Ikaztegietako Herri Eskola, Gipuzkoako Eskola Txikien Elkarteko kide da. Elkarte hau Gipuzkoako 25 Eskola Txikik osatzen dute eta elkar lanean aritzen dira, bai gurasoak, bai irakasleak, eskola txikiek dituzten arazoei konponbide bateratua emateko.

         Ikaztegietako Herri Eskola, Baikarako (Gipuzkoako ikasleen gurasoen federazioa) kide ere bada. Horrenbestez, ikastetxe gisa dagokigun eta interesatzen zaigun hainbat informazio helarazten zaigu.

         Eskolak hainbat baliabide eskaintzen ditu:

BALIABIDE PERTSONALAK:

	Gela bakoitzari dagokion tutoreaz gain, arlo desberdinetako espezialistez osatua dago (musika, ingelera, heziketa fisikoa).
	Behar bereziei atentzio egokia emateko Pedagogia Terapeutikoko irakasle espezialista dago.

TEKNOLOGIA BERRIEN ERABILERA:

	Ikasleak eskolara sartzen direnetik hasten dira ordenagailuak ezagutzen eta erabiltzen, bai lanerako eta baita jolaserako ere.
	Astero saioren bat egiten da bideo, diapositiba, CD edo DVD bidez, zenbait arlo lantzeko.

LIBURUTEGIA:

	Ikasturtez-ikasturte liburu interesgarrienekin hornitzen da. Eskolako orduetan lanerako erabili edota irakurtzeko, eta etxera eramateko aukera izaten dute.
	Urtean zehar irakurketa saio bereziak antolatzen dira, ikasle, guraso eta irakasleek parte hartzen dutelarik.

PSIKOMOTRIZITATE GELA:

HHko ikasleek, pixkanaka lortu beharreko gorputz trebetasuna, harremanak bideratzeko gaitasuna eta orokorki, ezagutza sakontzeko bitarteko bezala, psikomotrizitatea lantzeko gune aproposa dute. Gela hau materialez ondo hornitua dago.

Baliabideez gain, eskolak baditu bestelako zerbitzuak ere:

	JANTOKIA herriko kiroldegian kokatzen da. Jangela aurtengo ikasturtean estrenatu dugunez berri berria da. Bertan bi arduradun daude bazkaltzeko garaian eta ondorengo zaintzaz arduratzeko. Jangelan eskolako edozein ikasle gera daiteke eta ikasle guztiek diru laguntzaren bat jasotzeko aukera dute.
	ESKOLAZ KANPOKO EKINTZAK. Hainbat ekintza ezberdin antolatzen dira 3-12 urte bitartekoentzat (musika, ludoteka, pintura, judo, esku pilota, dantza...), eskaeraren arabera. Eskolako zenbait gela eta herriko kiroldegia erabiltzen dira iharduera hauetarako.